5 сентябрь щвелалде АхIмаднаби АхIмаднабиев чIварал чагIи ралагьичIони жидер 500 ялдаса дагь гьечIев чияс МахIачхъалаялда Авар театралда аскIоб ракъун чIей лъазабизе бугин бицана «Эркенлъи» радиоялъе «КIаратIа» жамгIияб идараялъул нухмалъулев ХIайбулаев ХIайбулаца.
ХIайбулаев ХIайбула: «Нижер кIаралазул бищун дагьалдасан 500 чияс ракъи лъазабизе буго АхIмаднабил чIвадарухъаби ралагьичIони. Ахирисеб болжал руго 5 сентябрь. Гьеб къоялде щвезегIан прокуратураялъги
Гьелъулги пайда ккечIони 8 сентябралъ рукIине ругел Дагъистаналъул президентасул рищиязе байкотги лъазабизе буо нижеца. Гьеб кинабго буго рес къотIиялъ гьабулеб иш, нижее батIияб нух толеб гьечIелъулха. Биччан те тIолго дунялалдаго бихьизе нилъер гьаниб бугеб гIала-гъважаги, гъалмагъирги, коррупцияги. АхIмаднабица жинде тIадекIанцIи гьабун букIанин, жиндие хIинкъаби кьолел ругин гIарзал хъвараб мехалда къуваталъул идарабаз жиндир заманалда тIадаб хIалтIи гьабун букIарабани гьев чIаго вукIинеги бегьулаан»
Гьединго ХIайбулаевас «Эркенлъи» радиоялъе бицана АхIмаднабиев чIварав чи валагьизе кумек гьабурал чагIазе жидеца гIарац кьезе бугилан.
ХIайбула ХIайбулаев: «500 азарго гъурущ кьезе буго нижер жамагIаталъ гьеб такъсир рагьизе кумек гьабурав чиясе. ЦIех –рехалъул идарабаз гьеб иш рагIалде бахъинабилин абун кколаро дида. Гьединал чанги такъсирал гьаруна нилъер гьаниб, цохIонигияб рагьичIо. Гьединлъидал гIадамазул кумекалде хьул буго нижер. Дагъистаналъул къуваталъул идарабазда нижер расги божилъи гьечIо, гьединлъидал Россиялъул цIех-рехалъул идарабазухъе кьейин гьеб ишилан тIалаб гьабизе ракIалда буго нижеда.
Гьединго нижеца бажарарабщинаб кумекги гьабизе буго цIех-рехалъул идарабазе АхIмаднаби чIварал чагIи ралагьизе. Гьев цониги чиясулгун тушманлъуда вукIарав чи гуро, гьев цохIо жиндирго журналистасул хIалтIуе гIоло чIварав чи вуго. Гьединлъидал цониги журналист чIваялъул такъсир рагьани, гьезулъ дагьабниги жидер ургъел бугин абураб пикру бижизе бегьула, амма гьаб сагIаталда жаниб журналистал руго бищунго хIинкъи бугеб ишалъул ва лъицаниги цIунун гьечIел чагIи»
АхIмаднаби АхIмаднабиев хIалтIилев вукIарав «Кавказский Узел» сайталъги гьев чIваяъул такъсир рагьизе кумек гьабуразе жидеца 200 азарго гъурущ кьезе бугилан лъазабуна дагьал церегIан къояз. Гьединго Швециялъул Сivil Riht Defenders абураб инсанасул ихтиярал цIунулеб гIуцIиялъги Россиялъул нухмалъиялъухъе ва къуваталъул идарабазул бутIрухъе АхIмаднаби АхIмаднабиев ч Iваялъул такъсир хасаб бербалагьиялде гъоркье босеян ва хехго гьеб рагьиялъе хIалтIи гьабеян абун хъварал кагътал ритIана.
Исана январь моцIалда АхIмаднаби АхIмандабиев чIвазе къасд гьабун букIана щалали лъаларел чагIаз. Жиндирго рукъалъул кIалда гьесде чанго нухалъ кьвагьдон рукIана, амма журналист маххул кавабазда нахъа вахчун бажариялъ гьесие щибго къварилъи ккун букIинчIо. Гьелдаса хадубги чанцIулго гьесул телефоналде мун гIодове вуссинчIони чIвазе вугилан абун хъван бачIун буго чанцIулго.
АхIмаднабиевасул адвокат ГIабдурашид Шейховас рикIкIунеб буго цIех-рехалъул идарабаз букIине кколеб кIвар кьечIин гьесул ишалдейилан. АхIмаднабиевасде кьвагьдон хадуб Россиялъул Уголовияб Кодексалъул чи чIвай яги чи чIвазе къасд гьаби абурал бутIабазда рекъон рагьун букIинчIо уголовияб иш. ЦIех-рехалъул идарабаз ургъунго чияр магIишат хвезаби ва къануналда дандекколаредухъ ярагъ хIалтIизаби абурал бутIабазда рекъон рагьун букIана уголовияб иш. Гьелда тIасан Шейховас диваналъул тIадегIанал идарабазде гIарзал хъваниги щибго хисизабунги бажаринчIо. Гьес рикIкIунеб буго къуваталъул идарабаз ургъунго гIин тIамичIого танин АхIмаднабил ишилан.
