Рамазан ГIабдулатIипов рещтIана МахIачхъалаялъул аэропорталда къад сагIат лъабго тIубарабго. Гьев дандчIвазе рачIарал гIадамазул халатаб читIир букIана аэропорталда сверухъ. ЦIияв республикаялъул нухмалъулесулгун халкъалъул лъай-хъвай гьабизе вачIана Шималияб Кавказалъул федералияб округалъул нухмалъулев Александр Хлопонин ва гьоркь вукIарав бетIер МухIамадсалам МухIамадов. БачIинахъего тIадегIанал гьалбазул халатаб читIир къокъана республикаялъул хъахIаб рукъалде. Гьенир ракIарун рукIана гIемерал гIадамал ва шагьаралъул аслияб майдан сверун рахъун чIун рукIана къуваталъул идарабазул хIалтIухъаби.
ЦIияв нухмалъулев вихьизавулеб данделъиялде ахIана гIицIго федералиял телеканалал ва республикаялъул РГВК телеканал. Гьенир рукIарал журналистаз бицухъе, Александр Хлопониница вихьизавуна ракIараразда цIияв нухмалъулев кIудияб политикияб хIалбихьи бугев, гIакъилав политик хIисабалда ва гьесда кIудияб жавабчилъиялъула
Халат бахъараб хъатчIваялдаса хадув трибунаялде вахъана Рамазан ГIабдулатIипов. Гьес тIоцебесеб иргаялда баркала кьуна жинда божилъи гьабураб федералияб тIалъиялда, жив лъабго моцIалъ ургъанин гьеб жавабияб хъулухъ тIаде босилалда цеве ва гьабсагIат хIадурун вугин республикаялъе нухмалъи гьабизе. Хадуб гьес бицана республикаялда тIоцебесеб иргаялда хисизабизе кколин кадровияб политика. ХIалтIуде росулаго конкурс тIобитIизе ккола, хъулухъазде рачине руго батIиял регионаздаса чагIиги абун бицана. Чанго соналъ цого бакIалда гIадамал хIалтIизе бегьуларин, гьел хисизе кколин ялъуни жеги тIадегIанаб хъулухъалде ине кколин. Шагьаразул ва мухъазул нухмалъулел рукIине кколин халкъалъ божилъи гьабулел, гьунар ва лъай бугел гIадамал. ЦIияв нухмалъулес бицана гьединго лъайкьеялъул системаялъул гIодобегIанаб даражаялъул хIакъалъулъ, сахлъи цIуниялъул хIалтIуе кIудияб кIвар кьезе кколин.
Республикаялдаса унел нартил рогIраздаса нарт бикъулел къокъабазул хIакъалъулъ лъалев чи гьечIо, федералияб хIинкъи гьечIолъиялъул идараялде гIунтIун, гьелъие ахир лъезе кколиланги бицана Р. ГIабдулатIиповас