Дагъистаналъул рищиязул комиссиялъ «Эркенлъи» радиоялъе кьурал баяназда рекъон, тIоцебесеб бакIалда буго «Цолъараб Россия» партия 58 % гьаркьазулгун, кIиабилеб – «РитIухъаб Россия» 13 проценталде гIагарарал гьаркьалгун, Коммунист партиялъе щун буго 7%. ГьабсагIаталда мухъалъе нухмалъи гьабулев Шабанов МухIамад депутатлъун ине ихтияр кьун гьечIо Юстициялъул министерлъиялъ. Щиб гIиллаялъ гьев нахъе гьавурав абураб суалалъе жаваб кьезе инкар гьабуна рехсараб министерлъиялда. Цо-цо экспертазул ва политологазул пикруялда рекъон, гьединаб хIукму гьабиялъе гIилла буго цебеккун диван тIад къотIарав чи рищулеб хъулухъалде рачIин гьукъараб къанун. Лъалеб букIахъе, гьединаб къанун къабул исана Пачалихъияб думаялъ.
Рищиязул хIасилазул хIакъалъулъ ва хъулухъалде рачIине бегьулел чагIазул бицана Гъизилюрт мухъалъул Кироваул росулъа цеве депутатлъун вукIарав АмирхIамзаев АмирхIамзаца.
АмирхIамзаев АмирхIамза: «Нилъер президент Рамазан ГIабдулатIипов вуго халкъияв президент. Амма гьесда сверухъ ругел чагIи гьечIо халкъалъул ургъел бугел. Дида лъаларо президентасухъе щолеб бугищали гьаниб бугеб ахIвал- хIалалъул хIакъалъулъ битIараб баян, амма бугеб жоялъухъ балагьарабго цIакъ лъикIаб гуреб хIал буго. Дун рищиязда гIахьаллъизе виччачIо президентасул жанисел ишазул управлениялъул нухмалъуев Артур Исрапиловас.
Шабанов нахъчIвана юстициялъул министерлъиялъ. ХутIарал киналго рищана халкъалъ 80-90% гьаркьазулги кьун. ГьабсагIаталда Шабановасухъе кьун буго Гъизилюрт мухъ, гьесда абизе буго МахIачхъалаялдаса пуланав чи вукIине кколин муниципалияб гIуцIиялъул нухмалъулевлъун. Малъараб гьесги гьабизе буго ва жиндихъ гIенеккулев гIадав муниципалияб гIуцIиялъул бетIер тезе вуго».
Республикаялъул рищиязул комиссиялъул баяназда рекъон рищиязул процесс ана гIодобиччан, тунка-гIуси ва дагIба-рагIи ккечIого. Гъизилюрталдаса Лабазанов ГIабдулвахIидица бицухъе, рищиял унел рукIин лъалеб хIал букIинчIо. Республикаялъул гIемерал политикиял къуватазул интересал цоцалъ тункулеб мухъалда рищиял гьедин гIодориччан иналъе гIажаиблъи гьабулеб буго гIемерисел политологаз ва журналистаз.
«Миллат» газеталъул бетIерав редактор БисавгIалиев МухIамадица «Эркенлъи» радиоялъе бицана Гъизилюрт мухъалда политикиял ва финансовиял интересал ругел къуватазул хIакъалъулъ.
БисавгIалиев МухIамад: «Дагъистаналъул президентлъун МухIамадсалам МухIамадов вугеб мехалдаго Гъизилюрт мухъулъул нухмалъулевлъун МахIачев ХIажи вачIарабго киназдаго бичIчIулеб букIана президентасе гьенив жиндир божарав чиги лъун гьеб мухъ кодобе бачине бокьун букIин. Гьеб буго гIемерал республикаялъул политикиялгун финансовиял къуватазул интересал цоцалъ тункулеб бакI. Гъизилюрталда интересал руго Пенсионнияб идараялъул нухмалъулев Сагид МуртазагIалиевасул интересал, спорталъул министр МухIамад МухIамадовасул итересал ва гьединго республикаялъул тIалъиялъулги рукIинарищха.
МахIачев ХIажи хъулухъалдаса нахъе витIиялъе гIилла буго цо-цоязул пикруялда рекъон, федаралияб къануналда цевеккун тIад диван гьабурав чи дандеккунгутIиги хIисабалде босун президентасулгун къотIи-къайги гьабун гьев нахъе ин, цогидаз бицунеб буго гьев хIакъикъаталда Р. ГIабдулатIиповас хъулухъалдаса нахъе витIун вугин. Гьел гIемерал чагIазул хьул бугеб бакIги хIисабалде босун, президентас гьениве витIана Шабанов МухIамад. Гьев вуго гьел киналго гьенир цоцалъ тункулел къуватазе гIага-шагарго данде кколев чи. Гьев вукIа абе, дов цоги жиндир дандияв вукIинегIан абун кколеб буго щивасда. Амма МахIачевасего гIадин, гьесиеги данде кколеб гьечIо муниципалияб гIуцIиялъе нухмалъи гьабизе, гьесда тIадги диваналъ хIукму гьабун буго.
Дихъе щварал баяназда рекъон, Шабановас щибаб партиялдаса жиндирго чагIи ккезарун руго депутаталлъун ва гьес жиндие бокьарав чи ккезавизе бегьула муниципалияб гIуцIиялъул бетIерлъун. Гьеб мехалъ гьесулгун контракт хъван живги районалъул администрациялъул бетIерлъун хIалтIун, жиндирго кверщаликь кквезе буго Гъизилюрт мухъ.
КIиго анкьидаса Гъизилюрт мухъалъул депутатазул данделъиялъ вищизе ккола Гъизилюрт мухъалъул муниципалияб гIуцIиялъул нухмалъулев.
Гъизилюрталдаса «Эркенлъи» радиоялъе щварал цо-цо баяназда рекъон, мухIканго абизе бегьула гьеб хъулухъалда хIалтIизе вугин цеве районалъул администрациялъул нухмалъулевлъун хIалтIулев вукIарав Багьавудин Адаматов.