Унъкгоялдасаги цIикIкIун миллион сириялъулал лъутизе ккун руго мадугьалил пачалихъазде жидерго улкаялдаса гьениб рагъулаб конфликт халат бахъунеб букIиналъе гIоло. Гьезул миллионалдаса цIикIкIун чи лъутизе ккун вуго ахирисеб 10 моцIида жаниб.
Гьединаб статистика загьир гьабулеб буго Цолъарал миллатазул гIуцIиялъул жидерго бакIал тезе ккаразул ишазул рахъалдаса идараялъул бетIер Антониу Гутеррешица.
Гьесулго рагIабазда, улкаялда жанир жидерго бакIал тун лъутизе ккаразул къадар кколеб буго анкьго миллионгун 600 азарго чи.
Ахирисеб хIисабалда рекъон, 2011 соналъул марталдаса, нухмалъиялде данде акцияби тIоритIизе байбихьаралдаса нахъе Сириялда хваразул къадар цIикIкIун буго 230 азарго чиясдасаги.