Тунисалъул президент Беджи Каид Эс-Себсица улкаялда лъазабуна гьорхъолъа борчIараб ахIвал-хIалалъул низам. Гьединаб хIукму гьабун буго дагьалъ цебе Сус абулеб хIухь бахъулеб шагьаралда туристазде экстремистаз тIаде кIанцIи гьабун хадусала.
ГIаммаб къадаралда 38 турист чIвана доб къоялъ, аслияб къагIидаялда – КIудияб Британиялъул гражданал. Доб гьужумалъул жавабчилъи тIад босана «Исламияб пачалихъалъ». ТIадехун рехсараб низам Тунисалда хIалтIизабизе буго лъеберго къоялда жаниб.