Кореялъул Халкъиябгун Демократикияб Республикаялъул цевехъан Ким Чен Ын Москваялда букIине бугеб Бергьенлъиялъул къоялъул байрамалда гIахьаллъизе гьечIо, ян лъазабуна Россиялъул президентасул пресс-секретарь Дмитрий Песковас.
Гьединаб хIукму гьес гьабун бугин улкаялъул жанисел проблемабазда бан ва гьелъул хIакъалъулъ лъазубан буго дипломатиялъул даражаялда. Дагьалъ цебе Россиялъул президентасул кумекчи Юрий Ушаковас лъазабун букIана Шималияб Кореялъул цевехъанасде вачIаян ахIи бан букIанин ва дов разилъанин.
Москваялде рачIине хиял бугел цо-цо къватIисел улкабазул тIадтаразе бокьун гьечIин Ким Чен Ын жидедаго цадахъ вихьизе ян абулеб хабар Кремлалъ нахъ чIвана.
Москваялда Бергьенлъиялъул Къо кIодо гьабиялъул байрамалда гIахьаллъи гьабиялдаса инкар гьабун буго лъебергогIан улкаялъул церехъабаз. Гьезда гъорлъ – Цолъарал Штатазул, Польшаялъул, Литваялъул, Латвиялъул, Швециялъул, Норвегиялъул ва КIудияб Британиялъул.