Россиялъ аресталде гъоркье йосун йигей Украиналъул пилот Надежда Савченкол эбелалъ дунялалъул лидеразде хIитIаб гьабун, гьарана, жиндир яс эркен гьайиялъул мурадалда Россиялъул президент Владимир Путиниде тIадецуй гьабеян.
"Ассошиэйтед Пресс" агентлъиялъе интервью кьолаго, Мария Савченкоца лъазабуна, гьелъул яс кколин политикияй туснахъин ва гьей гIайибияй йикIиналъул далилал Россиялъ загьирцин гьаричIин.
Гьелда цебе Мария Савченкоца кагътал хъван рукIана президент Владимир Путинихъеги, Германиялъул канцлер Ангела Меркелихъеги жиндирго яс Украиналде нахъе юссиналъе кумек гьарун.
Надежда Савченко цебесеб соналъул рииялдаса йиго Россиялъул изоляторалда. Жиндего гIунтIизарулел гIайибаздаса гьелъ нахъ чIвалел руго. Гьелъ абулеб буго, жиндир кинабгIаги хурхен гьечIин Россиялъул журналистазул хвелалде ва жинца Россиялъул гIорхъиги бахун букIинчIин, жий Россиялъул рахъалде сепаратистаз щвезаюнин.