Ираналъул тахшагьар Тегераналда бугеб СагIудиязул ГIарабустаналъул вакиллъиялъул минаялда цебе гIага-шагарго 300 чияс разилъи гьечIолъиялъул акция тIобитIана 11 апрелалда.
Гьез тIалаб гьабулеб букIана СагIудиязул вакиллъи къай ва ахIулаан СагIудазул Къираласул Рукъ какулел игIланал. Гьеб гуребги, демонстрантаз тIалаб гьабулеб букIана 28 марталда СагIудиязул ГIарабустаналъул Джидда шагьаралъул аэропорталда ккараб хIужаялъул мухIканаб цIех-рех гьаби.
Исана 28 марталда рехсараб аэропорталдf ккун вукIана балъуглъиялде вахъинчIев кIиго иранияв. Гьел ккун рукIанин полициялъ ва гъозие зулму гьабунин.
СагIудиязул ГIарабустаналъулгун Ираналъул гьоркьобакI квешлъана СагIудиязул бетIерлъуда гъоркь бугеб коалициялъ Йеменалда шиитазул яргъид гIуцIарал къукъабазде данде рагъулал ишал байбихьун хадусала.