Борис Немцов чIваялъулъ гIахьаллъарав цойги чи ватанин цIех-рехчагIазеян хъвалеб буго «Коммерсантъ» газеталъ.
Гьев чиясул мухIканаб цIар лъалеб гьечIо журналистазда. Немцов чIваравлъун рикIкIунев Заур Дадаевасул баяназдаса низам цIунулез чIезабун буго, Русикилан тIокIцIар бугев чияс гIуцIанин такъсир: автомобиль ва ярагъ кьун буго гьес ва абун буго политик чIван хадуб 5 млн гъурущги кьелин.
ЦIех-рехалъул комитеталда гьев чи вугеб бакI лъалеб бугин хъвалеб буго «Зона.Медиа» сайталъ. Порталалъул информациялда рекъон, гьев чилъун ккола «Север» батальоналъул бутIаялъул нухмалъев Руслан Геремеев.
Пачалихъияб Думаялъул депутат Адам Делимхановасул росулъ вахчун вугин гьев чийилан, лъазабулеб буго журналистаз. Росулъ нухал къан руго рагъулаз.
«ГIакъубаялде дандечIараб комитеталъул» нухмалъулев Юрий Каляпинил пикруялда рекъон, цIех-рех чагIазе кIвезе гьечIо Геремеев кквезе - гьединаб буюрухъ Кремлалъул администрациялдаса жеги бачIинчIо.
Немцов чIваялъул цIех-рехалъул документазда рехсон буго щуго цIар. Гьезда гъорлъ руго Чачан республикаялдаса ва Ингушетиялдаса чагIи.
Немцов чIвана 27 февралалда. Гьев чIварав бакIалда оппозициялъул активистаз мемориал гIуцIун букIана, амма гьал къоязда Кремлалъул рахъ ккурал гIуцIиязул вакилаз гьеб мемориал щущахъ биххизабуна.
Информалатаз лъазабухъе, мемориал тIагIинабеян буюрухъ бачIана президентасул администрациялдаса. Амма Владимир Путинил пресс-секретарь Дмитрий Песковас абуна, гьел тIадкъаял президентасул гьечIилан.