Украиналъул министразул кабинеталъ хъулухъалдаса нахъе вахъана ГIорхъолъа рорчIарал ахIвал-хIалазул пачалихъалъул хъулухъалъул бетIер Сергей Бочковский ва гьев хисулев Василий Стоецкий, гьединго регионазда ругел гьезул идарабазул бутIрул.
Бочковскийги, Стоецкийги ккун руго хIукуматалъул данделъи унеб мехалда. Гьел гьенисан рачун ун руго кверазда маххалги ран.
Гьел хъулухъчагIи ккун руго гьез гIуцIараб коррупциялъулаб схемаялъе гIоло. Гьелъул хIакъалъулъ лъазабуна, Украиналъул жанисел ишазул министр Арсен Аваковас.