Кабулалда гIадамаз вахIшияб къагIидаялда 27 сон барай Фархуда чIвалеб мехалда полициялъулал тIадеги балагьун, гьей хвасар гьайизе хIалцин бихьичIого чIанин, лъазабун буго ясалъул инсуца.
Афгъанистаналъул тахшагьаралъул мажгиталъул цоялъул дибирас гьей чIужугIаданалъ къуръан бухIанин лъазабураб мехалда, гIадамаз гьелда хвезегIан ганчIал речIчIун руго. Хадуб гьей юхIун йиго.
Фархудал инсуца лъазабун буго, жиндир ясалъул гIемер соназ психикияб унти букIанин.
Лъугьа-бахъаралъул нугIзабаз бицунхъе, гIадамазул ццим бахъиналъул къурбаналъ жий чIвалелда цебе абун буго дибирас лъимал лъугьунарел руччабазе сабабал ричулел рукIанин.