Сербиялда полициялъ аресталде гъоркье восун вуго I995 соналда Сребреницаялда бусурбабазул кIудияб къадар чIваялъул щаклъи бугев анкьго чи.
Сербиялъулги Босниялъулги прокуроразул гIаммаб къокъаялъ Associated Press агентлъиялъе лъазабуна, аресталде гъоркье росарал гIадамазде гIунтIизабулеб бугин I995 соналъул июлалда Сребреницеялъул рагIаллъиялда азарго гIанав бусурбанав чIваялда гIахьаллъиялъул гIайибин.
РикIкIунеб буго гьезул хIаракатчилъи букIанин Босниялъул сербазул яргъид гIуцIарал къокъабаздайин.
Прокуроразул лъазабиялда абулеб буго, анкьасда щаклъи бугин ракълилаб халкъалде данде рагъулаб такъсир гьабиялъулин.
Босниялъул машрикъалъул рахъалда бугеб бусурбабазул анклавлъун кколеб Сребреницаялда гIага-шагарго микьазарго бусурбанчи чIвай Цолъарал миллатазул гIуцIиялъ рикIкIунеб буго геноцидалъул актлъун.