ГIусманил империя гIуцIарасул кIудияв эмен Сулейман шагьасул хоб цIунулел рукIарал рагъулал Сириялдаса нахъе рачиналъул Туркиялъул армиялъул операция рагIалде бахъун буго.
Гьесул хобалъул комплекс букIун буго Сириялъул шималияб рахъалда бугеб Алеппо провинциялда. Гьенисан хъаравуллъи нахъе бачиналъул хIукму гьабун букIана Сириялда гражданияб рагъ унеб букIиналда бан ва «Исламияб пачалихъ» абураб экстремистазул гIуцIиялъул гIахьалчагIазулгун тунка-гIусиял унел рукIиналда бан.
Туркиялъул премьер-министр АхIмат Давудоглуца Твиттералда хъвана хобалъул комплекс Туркиялде щвезабунин ва хадуб гьеб нахъе щвезабизе бугин Сириялъул территориялдейин.
Сулейман шагьил хоб цIунун букIун буго Туркиялъул 40 солдатас.
I3 гIасруялда Сулейман шагь Евфрат гIор бахунеб мехалда гIанкъун вуго. Гьев вукъун вуго гьеб гIоралда аскIобехун бугеб бакIалда. Хадуб гьелде абизе байбихьун буго «Туркасул хобин» ва гьеб рикIкIунеб буго хирияб бакIлъун.
Гьеб хобалда хурхун I923 соналда Сириялъулгун гьабураб къотIи-къаялда рекъон, Туркиялъе изну щун буго гьениб жиндирго байрахъ чIвазе ва хIурматияб хъаравуллъи лъезе.