Пакистаналъул шималиябгун-магърибияб рахъалда хун вуго 19 чи шигIитазул мажгиталде тIадекIанцIи гьабиялъул хIасилалда. НугIзаз бицухъе, Пешавар шагьаралъул Имамия мажгиталда рузман-как балаго мажгиталде жанире рехун руго гранатаби ва хадусан гьенибе кьвагьунги буго. БакIалъул телевидениялъ бихьизабулеб букIана мажгиталъуса бурулеб чIегIараб кIкIуйги, гьенире гIедегIулел хехаб кумекалъул машинабиги.
Гьенир рукIаразул цояс бицунеб буго кIудияб кьвагьи ккун хадуб жинда сверун регрегун кканин лъукъарал гIадамалин. Гьеб тIадекIанцIиялъул жавабчилъи Пакистаналъул тIалибаз тIаде босун буго. Ахирисел соназда Пакистаналда цIикIкIун буго динияб кьучIалда гьабулеб зулму. Аслияб куцалда суннитаз тIадекIанцIиял гьарулел руго улкаялда дагьал шигIитазде.