Россиялъул ТIадегIанаб диванханаялъ инкар гьабун буго инсанасул ихтиярал цIуниялда сверун «Мемориал» центр биххизе кколин абураб юстициялъул министерлъиялъул гIарзаялъул тIалаб тIубазабизе.
Араб соналъул сентябралда Минюсталъ ТIадегIанаб диваналде кьун букIун буго гьеб гIарза «Мемориалалъул» хIалтIулъ яги документациялъулъ цо-цо къануналде данде кколарел бакIал ругин абун. Хадуб жибго Минюсталъ лъазабун букIана гьел дандеккунгутIиял «Мемориалалъ» къануналде данде ккезарун ругин, амма диваналде кьураб гIарза нахъе босун букIинчIо.
Доб мехалъ инсанасул ихтиярал цIунулез абулеб букIана Минюсталъул тIасанкIалъаязда гъоркь кьучI гьечIин.