Живго Имам Яралиевас ва гьесул сверухълъиялъ, хIатта Дербенталъул администрациялъул пресс-хъулухъалъгицин гьеб чIухь баялъе гIиллаялъул бицун официалияб къагIидаялъ киналгIаги баянал кьолел гьечIо. Гьел хасал тадбирал тIоритIулел рукIин лъан хадуб чанцIулго гьеб пресс-хъулухъалде ахIаниги жидер гьаниб щибниги лъугьа-бахъунеб жо гьечIила, кинабго ругьунаб къагIидаялда бугилан лъазабулеб букIана гьез.
Гьедин интернеталдаги цо-цо информалатаздаги Дербенталъул администрациялда чIухь балеб букIиналъул бицун баянал тIиритIун хадуб хамиз къоялъул сардилъ пресс-хъулухъалъ лъазаби гьабуна гьеб чIухьбай букIинчIила, жидеего къваригIарал документал росизе рачIун рукIанила хасал идарабазул хIалтIухъаби, гьел цIунун цадахъ рукIине кколила хасал тIадкъаял тIуралеб полициялъул къукъа ай ОМОНалъул хIаллтIухъабиги, гьедин рачIарал чагIи рукIанила кодоб ярагъгун гьелилан.
Гьеб баяналдаги пресс-хъулухъалъ мухIкалъи кьолеб гьечIо кинал документазда хадур гьенире хасал идарабазул вакилзаби рачIун рукIаралали. «Эркенлъи» радиоялъухъе щварал баяназда рекъон гьеб чIухь баялъе чанго батIияб гIилла буго. Аслияб къагIидаялъ гьеб бухьинабулеб буго шагьаралъул мэрлъун вукIарав Имама Яралиевас ва гьесул сверухълъиялъ пачалихъалъул мал-мулк, ай чанго нус-нус гектар ракьул, бесдал лъималазе рукъзал раялъе биччараб гIарац ва гьединго 2012 соналъ лъимкIанцIун Дербенталда рукъ-бакI хвезабурал чагIазе пачалихъалъ рецIалие биччараб гIарац бикъиялда.
Гьедин «Эркенлъи» радиоялъухъе щварал баяназда рекъон аслияб къагIидаялъ къуваталъул идарабаз кIвар буссинабун буго Дербенталъул администрациялъул ракьул ва мал-мулкалъул бутIаялъул нухмалъулев Сеидов Камилил хIалтIулеб рокъор ругел документазде. ГIемерисел документал гьесул гьениса рахъун ун руго низамцIунулез. Цебеги бесдал лъималазе рукъзал росизе пачалихъалъ биччараб гIарцуда сверун хIилла-рекIкI гьабиялъе гIоло тад такъсирияб ишги гьабун вукIун вуго гьев Камиль Сеидов. Гьел бесдалазе рукъзал кьеялъул ишги хасал идарабаз жидерго бербалагьиялде гъоркье бачун букIун буго.
Гьел церехун рехсарал гIиллаби гурониги гьеб чIухь баялъе ва документал рахъиялъе цойги батIияб, дагьабги аслияб, амма жеги къватIибе лъазе толеб гьечIеб гIиллаги бугин рикIкIунеб буго Дербенталдаса журналист МухIамад ХанмухIамадовас.
МухIамад ХанмухIамадов: «Гьеб киналъего гIиллалъун ккана Яралиевас жинцаго Дербенталъул тIалъиялда хиса-басиял гьариялда хурхун Шималияб Кавказалъул федералияб округалъул бетIер Сергей Меликовас Рамазан ГIабдулатIиповасде ахIи бахъинаби. Лъиданиги дандги бачIого Яралиевас гьединал ишал гьариялъ ццин бахъинабун буго Меликовасул, гьел гьаризе тунилан абун ГIабдулатIиповасдаги бахъун буго гьесул ццин.
Гьаб сагIат, дида ккола, гьаб нухалда гьеб чIухьбайги хутIарала хасал тадбиралги ГIабдулатIиповасдаги цIехечIого федералияб тIалъиялъ жидецаго багъаризабураб иш бугилан».
Гьединго журналистас рикIкIунеб буго щиб гьабунги Сергей Меликовас Имам Яралиев хъулухъалдаса инавиялде кIвар кьезе бугилан. Гьесул цIакъ ццин бахъинабун бугила Яралиевас кинаб букIаниги хIалтIи гьабулеб гьечIолъиялда ва хасго Дербенталъул 2000 сон тIубаялъул юбилеялде хIадури гьес тIубан хвезабун бугин цIакъ разигьечIого вугила Сергей Меликовилан. Гьединго журналистас абуна мухIканал гурел баяназда рекъон тIалъиялъ Имам Яралиевасда дуего бокьун хъулухъалдаса нахъе айилан лъазабун бугиланги.
