Франциялъул Даммартэн-ан-Гоэль шагьаралда полициялъул гьужумалъул хIасилалда эркен гьавун вуго вацал СагIид ва Шерив Куашияз гъоркьлъалие восун вукIарав чи. 7 январалда Парижалда сатирияб даптаралде тIадекIанцIи гьабиялда щаклъи бугел гьел кIиялгоги чIван руго.
Гьебго заманаялда Парижалъул машрикъалъул рахъалда эркен гьавун вуго кошериял кванил нигIматазул тукада гъоркьлъалие росун рукIарал гIадамалги. Гьел гъоркьлъалие росун рукIун руго вацал Куаширалгунрекъон хIалтIулев вукIарав –АхIмад Кулибалица. Гьевги чIван вуго полициялъул операциялъул хIасилалда.
Charlie Hebdo (Шарли Эбдоялдо) сатирияб даптаралде тIадекIанцIи гьабураб мехалда чIван вукIана 12 чи, гьезулги 8яв журналист ва 2яв паолицияв рукIун руго. Ахирисел баяназда рекъон, лъукъун вуго 11 чи.
ЦIех-рехалъ рикIкIунеб буго вацал СагIид ва Шериф Куашиял ругин рехсараб даптаралъ МухIамад аварагасде карикатураби рахъиялъухъ къисас босарал исламиял экстремисталин.
Гьел рижун ва гIун руго Парижалда Алжиралдаса бачIараб хъизамалда. Гьединго лъан буго гьезул кIудияв вац СагIид 2011 соналда Йеменалда «Аль-КъагIидалъул» рухIияв цевехъангун дандчIван вукIараблъи.
ГьитIинав Шериф лъабго соналъ туснахъ гьавун вукIун вуго ГIиракъалде рагъизе гIадамал ритIиялъулъ гIахьаллъи букIун.
Лъазабулеб буго гьел «Бют-Шомон» абулеб исламияб къукъаялде гъорлъе унел рукIанинги.