Франциялъул полициялъ къуватал цIалел руго Вильер-Коттере абулеб шагьаралде аскIоре. Гьенир рихьун рукIун руго арбагI къоялъ Charlie Hebdo (Шарли Эбдо) абулеб сатирияб даптаралде тIадекIанцIи гьабиялда щаклъи бугев кIиго чи. Цебе гьеб даптаралъ чанго нухалда кьун рукIана МухIамад аварагасде рахъарал карикатураби.
Полициялъул баяназда рекъон, вацал СагIид ва Куаши Шерифал рихьун рукIун руго цIатари бичулеб бакIалда. РакIалде кколеб буго гьезухъ ярагъги букIанин.
Гьелде щвелалде полициялъул кверде вачIун вуго 18 сон барав ХIамид Мурад. Гьебго заманаялда информалатаз лъазабулеб буго даптаралде тIадекIанцIи гьабураб заманаялда гьев школалда вукIанин.
Хамиз къоялъул къаде Франциялда лъазабун букIана цебесеб къоялъ чIварав 12 чиясул хIурматалда сихIкъотIиялъул минута.
Цебесеб къоялъ гьезул хIурматалда Парижалъул къватIахъе вахъун вукIана 100 азаргоялдаса цIикIкIун чи.
Франциялда лъазабун буго миллияб чIегIебай.