Пакистаналъул Файсалабад шагьаралъул туснахъалда гьатIан къоялда чIван вуго Россиялдаса гражданин Ахлас Ахлак. Гьесда гIунтIизабулеб букIана улкаялъул экс-президент Первез Мушарафф чIвазе къасд гьабиялъул гIайиб.
ТАССалъе гьадин лъазабун буго Пакистаналда бугеб Россиялъул вакиллъиялъул вице-консул Дамир Галиулиница. Гьеб ишалда сверун хIукму диванханаялъ къотIун букIана 2005 соналдаго. Ахлакида цадахъго, Мушарафф чIвазе къасд гьабунин абун, диваналъ чIвазе хIукму къотIун букIана жеги лъабго чиясеги. Гьел кколел руго Пакистаналъул гражданал.
Гьеб хIукму гьанжелъизегIан рагIалде бахъинабун букIинчIо улкаялда диваналъул хIукмуялда рекъон чи чIваялъе 2008 соналдаса нахъе мораторий лъазабун букIиндал. Гьеб мораторий нахъе бахъун букIана исана 17 декабралда Пешаваралъул школалде тIалибаз тIадекIанцIиги гьабун 148 чи чIвайдал. Гьезулги 132ял кколел рукIана школлъимал.
Россиялъул къватIисел ишазул министерлъиялъ чанго нухалда гьарун букIана Пакистаналъул рахъалда гьеб хIукму тамах гьабейин.
Пакистаналда гIумру гьабулев Ахласил эмен дандчIван вуго гьевгун чIвалелда цебе. Россиялда гIумру гьабулей гьесул эбелалъеги Пакистаналде ине виза кьун буго гьев чIвараб гьатIан къоялда. Ахлас Пакистаналде ун вукIун вуго 2001 соналда ва 2004 соналда гьев жанив тIамун вуго Мушарафф чIвазе къасд гьабуралъухъ.