Европаялъул диванханаялъ хвезабуна Палестиналъул ХIАМАС къукъа террористиял идарабазул Европаялъул сияхIалде босизе Евроцолъиялъул Шураялъ гьабун букIараб хIукму. Гьедин лъазабулеб буго Европаялъул диванханаялъул сайталда.
Диваналъ чIезабун буго гьеб къукъа гьеб сияхIалдего босун букIун бугин хасаб къукъаялъ гьезул «ишазул хал гьабураб хIасилалде балагьун гуреб информалатазда ва интернеталда тIибитIараб информациялъухъ балагьунин».
Гьедин бугониги банказда бугеб ХIАМАСалъул гIарац жеги чанго моцIалъ цIорозабунго тезе буго Евроцолъиялъ цоги хIукмуял гьаризегIан.
Диваналъул хIукмуялъухъ балагьичIого ХIАМАС террористияб къукъалъун рикIкIунеб бугин жидецайин лъазабуна арбагI къоялда Евроцолъиялъ. Гьеб къукъа террористазул сияхIалде босун букIана 2001 соналда. Гьеб террористияб бугин рикIкIунеб буго гьединго Канадаялъ, Израилалъ, Япониялъ ва Америкаялъ. Австралиялъ ва Британиялъ террористияблъун рикIкIунеб буго ХIАМАСалъул гIицIго рагъулаб гIаркьел.