Китаялъул тIадтараз 11 декабрялда гьабураб амруялда рекъон гьанжеялдаса руччабазе гьукъун буго паранжа ретIун хьвадизе уйгураз гIумру гьабулеб Синьцзян-Уйгур абулеб автономияб икълималъул тахшагьар Урумчиялда.
Информациониял агентлъабазул баяналда рекъон гьелдалъун гьениб бугеб ахIвал-хIал жегиги хIалуцине бегьулин. Мсана уйгураз гIумру гьабулеб икъималда цо чанго гьужум гьабун буго. Гьезул хIасилалда нус-нус чи къурбанлъун ккана.
Гьединал гьужумал гьариялда шаклъи бугел нус-нус уйгурав туснахалде жаниве тIамун вуго. Цо-цоял хIатта чIвазе хIукму гьабун буго диваналъ.