Associated Press агентлъиялъул лъазабиялда рекъон, Пакистаналда Цолъарал Штатазул пилот гьечIого боржулеб аппараталъ щвезарурал кьабиязул хIасилалда хун вуго «Аль-Каидаялъул» лидеразул цояв ГIумар Фарук. Гьесдаго цадахъ хун вуго цогиги щуго чи.
Гьелда цебе Пакистаналъул нухмалъиялъ лъазабун букIана Шималияб Вазиристан провинциялда гьабураб рейдалъул хIасилалда чIванин «Аль-Каидаялъул» цогидав лидер Аднан Шукриджумах.
ФБРалъул информациялда рекъон, 27 сон барав Шукриджумахиде гIайиб гIунтIизабулеб букIана 2010 соналда Нью-Йоркалъул метроялда терактал хIадуриялъул.