Украиналда бортараб Малайзиялъул «Боингалъул» хутIелал Харьковалде ритIун руго сепаратистаз контроль гьабулеб территориялдаса. Абулеб буго Голландиялъул махшелчагIаз тIад пломбаби лъураб юк бачунеб 12 вагон Донецкалда аскIоб бугеб Пелагеевка росулъа багъарун анин.
Голландиялъул экспертаз гурелги, гьеб маршруталъухъ хал-щал гьабулеб буго Европаялда ХIинкъи ГьечIолъи ЦIуниялъул ва Рекъон ХIалтIи гьабиялъул ГIуцIиялъул вакилзабазги.
Амстердамалдаса-Куала-Лумпуралде боржун унеб букIараб рехсараб авиалайнер сепаратистаз речIчIун бортизабун букIана исана I7 июлялда. Гьелда рекIарав 298 пассажир гIумруялдаса ватIалъана. Аслияб къагIидаялда Нидерландазул гражданал.
Россиялъул тIадтараз абулеб буго жидер кинабгIаги хурхен гьечIин гьеб хIужаялда.