Россиялъул къватIисел ишазул министр Сергей Лавровас жиндирго цебесеб лъазаби такрар гьабун, абуна – Украиналда халат бахъунеб конфликталда Москваялъ гIахьаллъи гьабулеб гьечIин.
Гьесул рагIабазда рекъон хасго Магърибалъ квалквал гьабулеб буго Украиналда рекъел тIад чIезабиялъе. Гьадин гьес абуна Россиялъул Пачалихъияб Думаялда цеве вахъун.
Дагьалъ цебе Украиналъул Президент Петр Порошенкоца Донбассалъе блокада гьабиялда хурхараб буюриялъул хIакъалъулъ пикру гьабулаго, Сергей Лавровас абуна гьеб рикIкIине бегьулин рагъулал ишал халат бахъинабиялде гьабулеб хIадурлъилъун.
Москваялъ тIалаб гьабулеб буго сепаратистазулгун Украиналъул тIалъиялъул кIалъа-басаял тIоритIи, амма Магърибалъе гьеб бокьун гьечIин.