Албаниялъулги Сербиялъулги премьер-министрал Эди Рамаца ва Александр Вучичица цоцаде гIайибал гIунтIизаруна Албаниялъул нухмалъулесул Белградалде визит унеб мехалда тIобитIараб пресс-конференциялда.
Эди Рамаца Сербия ахIана 2008 соналда лъазабураб Косовоялъул лъиданиги бачIоголъиялъул сатус къабул гьабиялде, «нужеца гьеб къабул гьабурабгIан хехго, нилъ цере ине ругинги» жубан.
Сербиялъул премьер-министр Александр Вучичица лъазабуна Рамал лъазаби провокация кколин. Гьесги жубана Сербиялъул провинциялъун букIараб Косово пачалихълъун Белградалъ киданиги рикIкIине гьечIин.
Сербиялъги Косовоялъги гIамал гьабулеб буго Евроцолъиялде гъорлъе лъугьине. Амма гьездаса Евроцолъиялъ тIалаб гьабулеб буго регионалда хIалуцин гIодобе ккезаби ва Сербиялда албаназул ихтиярал тIуразари.