26 октябралда Афгъанистаналда официалияб къагIидаялда рагIалде рахъана Цолъарал Штатазул ва Британиялъул рагъул къуватазул хасал операцияби.
Рагъулал объектал кьуна Афгъанистаналъул армиялъухъе, къватIисел пачалихъазул офицерал ва солдатал хIадурлъулел руго Афгъанистанладаса нахъе ине.
Кидал гьел нахъе ине ругелали рагъулаб балъголъи кколеб буго.
Гильменд провинциялда, халкъазда гьоркьосел къуватазул регионалияб командованиялъул штабалда гIодоре риччан руго Цолъарал Штатазул ва Британиялъул байрахъал.
Америкаялъул рагъулаз Афгъанистаналъул нухмалъиялъухъе кьуна «Кэмп Лезернек» абураб база. Гьениб букIана бищунго кIудияб гарнизон.
Британиялъулаз Афгъанистаналъул армиялъухъе кьуна «Кэмп Бэстион» абураб база. Гьелъул хIакъалъулъ лъазабулеб буго Reuters агентлъиялъ.