Украиналъул улка цIуниялъул министралъул хъулухъалде Президент Петр Порошенкоца ТIадегIанаб Радаялда цебе лъуна Миллияб Гвардиялъул бетIер Степан Полторакил кандидатура.
Гьеб суал Украиналъул парламенталъ гьоркьоб лъезехъин буго талат къоялъ. ГьатIан къоялъ Петр Порошенкоца къабул гьабуна улка цIуниялъул министр Валерий Гелетейил гIарз – жив хъулухъалдаса эркен гьаве ян абураб. Украиналъул президентасул пресс-хъулухъалъ лъазабухъе – заман щванин рагъулаб идараялъул бетIер хисизе.
Порошенкол рагIабазда рекъон гьединго хизизехъин руго Гурхъаби цIунулеб ва Хасаб цIех-рех гьабулел идарабазул бутIрулги. Гьелдалъун Украина цIунулеб ищ жеги щулалъила, ян баян гьабуна президентас.