Ахирисеб лъабго анкьалда жаниб 100 азарго гIанав чи лъутизе ккун вуго жидерго бакIаздаса Ливиялъул тахшагьар Триполиялъул рагIаллъабазда тIоритIулел тунка-гIусиязе гIоло.
Гьелъул хIакъалъулъ лъазабулеб буго Цолъарал миллатазул гIуцIиялъул лъутизе ккаразул ишазда сверун тIадегIанав комиссарасул вакилас. Жидер бакIал тун лъутIизе ккаразул гIаммаб къадар улкаялда жакъа цIикIкIун буго 280 азарго чиясдасаги.
Ливиялда халат рахъунел руго яргъид гIуцIарал батIи-батIиял къуватазда гьоркьор тунка-гIусиял. Гьел байбихьана лъабго соналъ цебе Муаммар Каддафил режим тIаса рехун хадуб.