Новосибирскалъул суратал хъвалев Артем Лоскутовасулгун «Сибиралъул федерализациялъухъ марш» хIадурулеб букIиналъул хIакъалъулъ интервью бахъиялъе гIоло Россилъул 14 СМИ-ялъухъе «Роскомназоралъ» битIун буго хасаб лъазаби.
Slon.ru абураб интернет-порталалъ нахъ бахъизе ккун буго гьеб интервью Генералияб прокуратураялъул тIалабалда рекъон.
Интервью бахъун буго «Полит.ру» Regnum, «Новый регион», «Росбалт» ва цогидал интернет-сурсатаз. «Роскомнадзоралъ» рикIкIунеб буго, гьеб интервьюялда бугин гIадамал къануналъ гьукъарал тадбиразде гIахьаллъиялде ахIийин.