Кабулалда микьго аскарияв хун вуго гьел рекIараб автобусалда аскIоб живго чIвалес кьвагьи гьабун хадуб. Полициялъ лъазабулеб буго кьвагьиялъул хIасилалда щуго гIадатияв чи лъукъун вугин.
Кьвагьиялъул жавабчилъи тIалибаз тIаде босун буго.
Теракт гьабун буго Кабулалъул бищунго лъикI цIунулел мухъазул цоялда университеталда аскIоб. Гьеб буго Рамазан моцI байбихьаралдаса шагьаралда гьабураб тIоцебесеб кьвагьи.