Украиналъул машрикъалъул рахъалда цIидасан рагъарун руго рагъулал ишал. Донецкалда гъоркьехун бугеб Карловка росдал сверухълъиялда талат къоялда унеб букIана танкабазул рагъ. Гьедин лъазабулеб букIана нугIзаз ва информалатаз.
«Донецкалъул халкъияб республикаялъул» вакилзабаз лъазабулеб буго Снежный абулеб шагьаралда гъоркьехун жидер рагъухъабаз Украиналъул рагъулаб аэроплан бортизабунин. Гьеб баян официалияб куцалда уяблъун гьабун гьечIо.
Талат къоялъул радал рагъал унел рукIана Луганск икълималда Россиялъулгун гъорхъода аскIор ругел «Донецк» — «Изварино» ва «Краснопартизанск» — «Гуково» абулел бакIазда. Украиналъул миллияб гвардиялъ гьужум гьабун буго сепаратистазе. Россиялъул гIурхъаби цIунулел зарал кколаребгIан бакIалде нахъе къан руго.
Дагьаб цебегIан лъазабулеб букIана талат къоялъул радал Донецк икълималъул Краматорскаялда кьвагьиялде гъоркье ккун бугин гIадамал рекIараб автобус ва ункъго чи хун, щугояв лъукъун вугин.
«Информационияб дандечIей» абулеб къукъаялъул бетIер Дмитрий Тимчукица Facebookалда хъван букIана Украиналъул аскариязул контролалда бугеб Краматорскалъул аэропорталде кьвагьулеб букIанин ва цо солдат чIван вугин.
Гьединго, талат къоялъул радал Луганскалда аскIоб щалали лъаларел чагIаз кIиго бакIалдасан кьвагьизабун буго маххул нух.
Украиналъул президент Пётр Порошенкоца цебесеб къоялъ лъазабун букIана Донец ва Луганск икълимазда цо рахъалъ кьвагьи чIезабиялъул режим жинца къотIизабулеб бугин.