Докку ГIумаров чIван вугин рагIула

«Имарат-Кавказ» абулеб багъа-бачариялъе квербакъи гьабулеб «Кавказ-центр» сайталъ лъазабулеб буго Шималияб Кавказалъул яргъид гIуцIарал бусурбабазул бетIер Докку ГIумаров гIумруялдаса ватIалъанин. Амма дурус гьабун гьечIо хвелалъе гIиллалъун щиб ккарабали.

Докку ГIумаров чIван вугин абураб хабар цебеги чанги нухалъ загьирабун букIана, амма «Кавказ-Централъ» гьединал лъазабиял нахъ чIвалел рукIана.
Россиялъул официалиял гIуцIабаз гьеб информация я дурус гьабулеб гьечIо, я нахъ чIвалеб гьечIо.