Унсоколо мухъалъул Балахьуниса гIадамаз лъазабулеб буго 3 ва 4 январалъ низам цIунулез гьезул росулъ чIухь балеб букIанилан. Цин гьел хасал тадбирал изну гьечIого яргъидгIуцIаразул кьерулъ рукIиналда щаклъи бугезул гIагарлъиялъул дора тIоритIизе ругин ккун букIун буго бакIалъул гIадамазда, амма къуваталъул идарабазул вакилзаби батIи-батIиял чагIазул минабахъе раккарун руго. ЧIухь балелъулги гьез рукъалъул бетIергьабазул ихтиярал хвезарунин, гьеб тIобитIулеб мехалда къануналда рекъон рукIине кколел нугIзал ахIичIин жидецаго ва рукъалъул бетIергьабаз ахIизеги течIилан. Белехьдерица бицухъе чIухьбан хадуб цониги минаялъуб щибниги гьукъараб жо батун гьечIо низам цIунулезда. Гьеб росдал гIадамаз рикIкIунеб буго къуваталъул идарабазда жидеца рохьилал хасало рокъор рахчизарун ругин кколеб бугин, гьел ралагьиялъе гIоло тIоритIун рукIанин гьел тадбиралгийилан. Унсоколо мухъалъул жанисел ишазул бутIаялда Балахьуни лъугьа-бахъунелъул жидеда щибго лъаларин, гьенир киналниги хасал тадбирал тIоритIичIин лъазабулеб буго.