Ригаялда «Максима» абулеб супермаркет тIураб бакIалда жеги 10 чи хутIун ватизе рес буго. Телевиениялдасан улкаялъул полициялъул бетIер Интс Кюзисица лъазабуна гIадамал тIагIанин абураб 10 гIарза бачIун бугин жидехъейин. Гьелде тIадеги гIадамал хвасар гьариялъул хIалтIаби халат рахъунеб бакIалда чIун вуго жидер гIагаразул хIакъалъулъ щибго лъаларев ункъго чиги. Гьеб бакIал хвасарчагIаз квераз бацIцIад гьабулеб буго техника хIалтIизабуни хутIарабги гьеб тIун иналда хIинкъи букIун. Шамат къоялъул радалалде гьениб батун буго 52 жаназа. Гьезул кIиго чIужугIадан щалали лъалеб гьечIо. Лъукъарав 40 чиясул азарханабазлда хутIулев вуго 29-яв. Латвиялда лъазабун буго чIегIер баялъул лъабго къо. Литвагун Эстониялъги 24 ноябрь лъазабун буго чIегIер баялъул къолъун. Супермаркеталъул тIох тIун буго хамиз къоялъул къаси. Цин биххун буго цо къедги тIохги, хадуб хвасарчагIаз хIалтIаби байбихьараб мехалда биххун буго цоги къед. Гьеб мина бан букIун буго 2011 соналда.