Краснодаралъул диванханаялъ гIумруялъго туснахъалъув вукIине хIукму къотIун буго Кущевская росулъ 12 чи чIваялъул аслияб гIайиб гIунтIизабулев Сергей Цапокие. Гьесул чукъби- Владимир Алексеевасе ва Игорь Черныхиеги къотIун буго гьединабго хIукму. ХутIарал лъабгоязе кьун буго туснахъалъул 19-20 сонал. 2010 сонулъул 4 ноябралда Цапокил хъачагъазул къукъаялъ тIадекIанцIи гьабун буго Сервер Аметовасул фермаялде ва чIван вуго гьенив вукIарав 12 чи, гьездаго гьоркьоб ункъго лъимерги. Гьеб такъсиралъ улкаялдаго кIудияб ахIи-хIур багъаризабун букIана.