Россиялъул оппозиционияв активист Алексей Навальныясе гьабун буго Москваялъул мэрасул рищиязда кандидат хIисабалда регистрация. Рищиязул комиссиялъул вакилас бичIчIизабуна РПР-ПАРНАС партиялъ вихьизавурав гьев кандидатасда тIад гьабулеб «Кировлес» абун лъалеб диваналъул процессалда гьесие туснахъалъул хIукму къотIани ва гьеб рищиял тIоритIиялде къуваталде лъугьани Навальный рищияздаса нахъе вахъизе вугин. Гьеб хIукму абуни диваналъ къотIизе ккола Киров шагьаралда хамиз къоялда. Цо-цо баяназда рекъон, гьениве вачIине вуго нусгоялдаса цIикIкIун журналист.