Америкалъул сержантасе диван гьабизехъин буго.

Вашингтоналда байбихьана Америкалъул аскаралъул сержант Роберт Бейлзил такъсирияб ишалъул цIех-рех. Гьесде гIунтIизабулеб гIайиб – Апгъанистаналда 16 чи чIвай ва жеги 6 чи чIвазе къасд гьаби.

Диваналъул гIенеккиял халат бахъине буго кIиго анклъалъ.

ЦIех-рехалъул баяналда рекъон исана 11 марталда Кандагар шагьаралда бугеб жиндирго рагъулаб бутIа тун гьев вачIанин аскIоб бугеб цо росулъ ва ракълилал гIадамазде кьвагьдезе байбихьана. ЧIваразда гъорлъ лъималги руччабиги рукIун руго.

МахIкамаялъ Бейлз гIайибиявлъун рикIкIани гьев чIвазе къотIи гьабизе рес буго.