«Магжилазе» полициялъ номерал кьолел руго

Итни къоялъул радалго социалиял бухьеназда цIакъго жигаралда бицунеб букIана «Кавказская политика» сайталда журналист Рустам Апаевас гьев кьижаралъусаги вахъинавун жиндирго рокъоса къуваталъул идарабазул вакилзабаз полициялде вачиналъу хIакъалъулъ хъвараб макъала. Гьениб журналистас мухIканго хъван бугоан гьесул рокъоре полициялъулал рачIиналъулги, гьезул хьвада-чIвадиялъулги, полициялъул отделалдеги вачун гьесиеги гьесдаго цадахъ рукIарал цойгидазеги номер кьураб куцалъулги. «Эркенлъи» радиоялъулгун букIараб гара-чIвариялдаги Рустамица гьатIан къоялъ жиндирго кканщиналъул баян кьуна.

Рустам Апаев: «ГьатIан къоялъул радал анкьгоялда нуцIа бухиялъ ворчIизавуна дун. Кодор автоматалгун кIалтIа чIун ратана полициялъул хIалтIухъанги цо чанго гьурмада маскахуравги. Гьез щиб кинилагицин бичIчIизабичIого цересан киналго рукъзабахъе жидерго рокъор гIадин жаниреги лъугьун гьениб хал-шал гьабизе лъугьана. Кьижарал лъимал ругеб рокъорецин лъугьун гьенибги сундухъго ралагьана гьел. Документал цIехана дирги, лъадулги, гьезул хал гьабун хадуб дун кинаб мажгиталде уневилан цIехолдизе лъугьана. Дица батIи-батIиял мажгитазде унин дун, гIемерисеб мехалда аскIобегIан бугелъуве хьвадулин абидал гьез тIа-тIала руссун Котрова къотIноб бугеб мажгиталде уневищилан цIехезе лъугьана, гьенивеги унин цо-цойин дица абидал, жидеда цадахъ къватIиве вилълъине хIадурейилан лъазабуна. Лъадудаги абуна гьединго, цояс гьезул рокъор кьижун кIиго гьитIинаб лъимер бугин абидал, чIужу рокъой тана. Гьедин автобусалда жанирги рекIинарурал нижеца аскIове вахана цо офицерги, гьес воххуца холаго, экскурсиялде рачун унел ругел лъимал гIадин полициялде рачана ниж".

Кире рачунел ругелалиги бицинчIого Апаевги гьесдаго цадахъ автобусалъув вукIарав 40 гIан чиги низам цIунулез МахIачхъалаялъул Советский мухъалъул полициялъул бутIаялда рачун руго. Гьенир щивасул документазул халги гьабун, паспорталъул баянал хъван руго ва щиб ишалъул чагIийин, кида МахIачхъалаялде рачIаралин, гIагараб заманалда гьаниса кирениги инехъин ругелищин абурал суалал кьолел рукIун руго.

Рустам Апаев: «Полициялъул отделалде рачанщиназухъе кодоре кьолел рукIана номерал тIад хъварал кагътил кескал ва цере гьелги ккун суратги бахъулеб букIана щивасул. Гьал щал номералин цIехедал магIна бугеб жаваб кьолев чиги лъугьинчIо. Дида полициялъулал цIехолдулеб мехалда дица абуна дун дагьав цевегIанги вачун вукIанин гьаниве, дир киналго баяналги росанин, килщазул сураталги рахъанин абун. Гьелдаги хьимхьилаго абуна гьел низамцIунулез гьанжеялдаса хадуб мун нухда чIезавуни дуца дурго номер бицейилан, гьеддаса хадуб дудехун лъилниги суалал рукIунарилан. Гьелдаги божилъиго гьечIо дир, кинха божилеб нухдасан унаго рас халатаб бугин абунцин чIезавуна дун цин полициялъулаз, хадуб къотIноб шаурма босе чIараб бакIалдаса вачун вукIана гьез дун».

Апаевас рицарал лъугьа-бахъиназул хIакъалъулъ, гьес абухъе гIадамазе кьолел номеразул магIна щибилин цIехедал Дагъистаналъул жанисел ишазул министерлъиялъул пресс-хъулухъулъул нухмалъулей Фатина ГIубайдатовалъ «Эркенлъи» радиоялъе бицана журналистас жиндиего бокьараб хIалалде буссинабун бугин гьеб кинабгойилан.

Фатина ГIубайдатова : «Кинаб бугониги такъсир гьабиялда щаклъи бугел гIадамал хIисабалде росула къуваталъул идарабаз. Гьезул сияхI гIуцIун хадуб щивасул суратги бахъула, гьеб щибаб сураталъе номерги кьола, гIадамазе кьолел номерал кколаро гьел»

Гьединго ГIубайдатовалъ кьурал баяназда рекъон, Волгоградалда кьвагьи ккун хадуб Дагъистаналда киса-кирего изнугьечIого яргъид гIуцIаразде данде къеркьеялъул тадбирал гIемер тIоритIулел руго. Аслияб къагIидаялъ, Волгоградалда автобус кьвагьизабурай Гъуниса Асиялова Наидал рос ва гьеб такъсиралде гьей хIадураравлъун рикIкIунев Дмитрий Соколов валагьи букIанин бицана гьелъ. Шамат къоялъ МахIачхъалаялъул Семендералда тIобитIараб хасаб тадбиралъул хIасилалда гьев Соколовги цойги 4 изнугьечIого яргъид гIуцIаравги чIвана.